सिरहाको नरहा गाउँपालिका–३ स्थित चोहर्वा–सिराहा सडकखण्डमा प्रहरीको नियमित जाँचका क्रममा नलकटुवा पेस्तोलसहित तीन जना भारतीय नागरिक पक्राउ परेका छन्।
जिल्ला प्रहरी कार्यालय सिराहाका अनुसार भारतको बिहार राज्य, मधुबनी जिल्ला बेलही पञ्चायत पूर्वीटोल–३, छारापटी कमलाका २० वर्षीय ओमशंकर यादव, ऋषिनाथ र आकाशकुमार मण्डललाई मंगलबार अपराह्न पक्राउ गरिएको हो।
इलाका प्रहरी कार्यालय मिर्चैयाका प्रमुख प्रहरी नायब उपरीक्षक राजेशराज पुरीको नेतृत्वमा खटिएको टोलीले शंका लागेर बिआर३२एडब्लु १८१२ नम्बरको मोटरसाइकल रोकेर चेकजाँच गर्दा लुकाएको नलकटुवा पेस्तोल बरामद भएको हो।
एउटै मोटरसाइकलमा रहेका तीनजनालाई त्यसपछि पक्राउ गरिएको प्रहरीले जनाएको छ। पक्राउ गरिएका तीनजनालाई मिर्चैया प्रहरीमा राखेर थप अनुसन्धान भइरहेको जिल्ला प्रहरी कार्यालय सिराहाका सूचना अधिकारी प्रहरी नायब उपरीक्षक वीरेन्द्र पासवानले जानकारी दिए।
उनका अनुसार पक्राउ परेकाहरूलाई बुधबार सिराहा जिल्ला अदालत उपस्थित गराई हाततियार तथा खरखजानासम्बन्धी मुद्दामा अनुसन्धानका लागि म्याद लिइनेछ।
